شِيخ الكْلام: ” نِيابة لْعُمدة ومْوالين الزْردة..”

من خواطر شيخ الكْلام..

بْحال دِيما كْلامي ما يْعجب لْعْدا، وعلى نِيابة العُمدة لْيوما غادي نْبْدا، تْجمعو عليها بْحال لْمُهرِجين على شي قْردة، اولا بْحال الحَوَّاتة كَِتْزايدوعلى صندوق دْسَرْدة، واش وْجدتو شي شْكارة بعدا، والله لا ديتيها اذا كنت جْلدة أولا سَنْستوها باردة..

يا لطيف لْعْوافي نايْضة عيلها زانْدة، طنجة مْسكينة هذا هو ساعْدة..

هي تْعَطلت فْكرش يْمّاها راكْدة..كٌلشي بْلَع لْسانو وما سَقْسا عْلِيهَا شْعَندا..لي عَيْنو فيها كِخَيْطا بْحال لي كِطَرْز رانْدا..

باش تْدخل عْليها خْس تْكون عَنْدك الكْبدة والقَلْدة..ما يْخلعك لا عُمدة ولا مْردَة..ومَتكونشي بْحال هذاك لي وْصَلْها وخْلّاها وفْالبَرلمان لْبّْدا ونْساها وفأرض الجماعة شراها وباعْها..

لحْمامة طَلْبا غِير السَلامة ولْكَيْدر شَبْراه نْدامة وناس لمِيزان فيهم شْوية دْالشَهامة وخا بِيناتهم شْكّامة ونْمّامة أمّا لامْپة نازْلة عْليها غْمامة وإذَاعَوْلْتو على التْراكتور ما يْوَصلْكومشي حْتى لْحكامة..والسُنبلة والوردة قَرْبو لكلشي وما عْلِيهم عْلامة..أما واحد ما تابع لْحْتى حزب تابع غير نفسو لّوّامة..ما عْرفنا هادي واشْ سِياسة وْلا لٌعبة الضَّامة..

السيد الوالي ضاقْ الحالْ، اذا شفتي مْدادنا سالْ راه غير الغِيرة على لْمدينة لي كَتْحَركنا مْلي كِيبقا فينا الحالْ و اذا سْكتنا عليهم مَا تْجينا راحة لْبال..الفَرَج يْجي من جِهتوم مُوحالْ، ورْجانا فالله وفيك ويا مُبدِّل الأحْوال..

فْمْقام أَخَر يْتجدد لْقانا..ولي فْتش عْلينا يْلقانا..وْيَا وِيلو لِجاتني عْليه لْكانة..