شيخ الكْلام..”لَجورة مور لَجورة احْسن من الدْكتوراه”

من خواطر شيخ الكْلام..

بِاسم الله بْدينا وعْلى النبي صلّينا، ضِيفنا اللِيلة هو صاحب مقولة لَجورة مُورْ لَجورة احْسن من الدكتوراه، هادي مادخلاشي فأقوال مأثورة ولكن قالها واحْد قاري مور السبُّورة..

من خْفتو الكْبيرة خْلاتنا نطلعوه فْالصورة..التْخربيق لي بْداه فعالم السياسة باغي يْكملو فْالكورة، مْبلي بالتجزيء وخْلّا الساكنة لي صَوْتت عليه مْقهورة..ماعندو لا جار ولا حْبيب وكيسْتنا صاحبو فْالدُورة..ولكن دابا تْدور عليه الناعورة..

قالوم أنا خبير فْالتعمير وما تاقو به غير صْحاب الطْبل والبْندير، وخا بغيت نتيق فيك ما لقيت كيف نْدير..حِيث البارح وانت مْخصوص ويْدِّين سْيادك تْبُوس وكُنت بِينْهم مْدسوس كَتْحفظ الدُروس، ونْهار تْعَلمتِ عْلى صْحابك تْقلبتِ وعْليهم حَرْضتي وْأديتي..

التْخَرويض فيك بْليّة وانت أدِيّة ومْعروف عْليك قْليل النيّة..ماين جْمعتي هاد الفْلوس كْبيرة وخا تْكون كَتْخدم فْهِيَّ..المُهم مَنْقدرشي نزيد حيث عَزِّيتي عْليّا ورُد بالك من الكْريّة..

فْمْقام أَخَر يْتجدد لْقانا..ولي فْتش عْلينا يْلقانا..وْيَا وِيلو لِجاتني عْليه لْكانة..